Policia e Kosovës në rajonin e Ferizaj ka shqiptuar gjithsej 295 gjoba gjatë muajit mars 2026 ndaj shoferëve që kanë përdorur telefonin gjatë ngasjes së automjeteve.
Sipas njoftimit, përdorimi i telefonit gjatë drejtimit të mjetit vazhdon të mbetet një nga shkaqet kryesore të aksidenteve rrugore, duke rrezikuar seriozisht sigurinë e shoferëve dhe të pjesëmarrësve të tjerë në komunikacion.
Policia Rajonale e Ferizajt u ka bërë thirrje të gjithë qytetarëve që të jenë të përqendruar maksimalisht gjatë vozitjes dhe të shmangin çdo lloj shpërqendrimi. Sipas tyre, edhe një moment i shkurtër i përdorimit të telefonit mund të ketë pasoja të rënda për jetën e njerëzve.
Autoritetet gjithashtu kanë inkurajuar qytetarët që të raportojnë shkeljet e rregullave të trafikut, qoftë në stacionet më të afërta policore, përmes aplikacionit Lajmëro Policinë, apo në numrat kujdestarë të policisë.
Policia ka garantuar se çdo raportim do të trajtohet me konfidencialitet të plotë./teve1.info/
