Shefi i Grupit Parlamentar të AAK-së, Besnik Tahiri ishte njëri prej të përfshirëve në njërën prej videove të partisë në pushtet, përmes së cilës Vetëvendosje kishte shpërfaqur akuza ndaj eksponentëve të ndryshëm të opozitës.
Tahiri thotë se fillimisht për këtë video kishte folur në Kuvend.
“Unë as që e kam pa atë video, por ishim në shpi dhe po më thotë prindi: Të kishin qit në video. Njëherë nuk e bona të madhe por pastaj e ktheva. Edhe dola në Kuvend, u thashë zotni kush jeni ju me më vendos në video, çka kam keqpërdor unë që 20 vjet, nëse keni dilni në Kuvend dhe thoni qeta e ke keqpërdor”, ka deklaruar Tahiri.
Ai ka shtuar se është në konsultim me avokatin për mundësinë e ankimimit për përdorjen e fotografisë së tij në video.
“Ankimimi ish njëfarë procedurë që po u dashke avokati me çu një letër, unë jam në konsultim me avokatin por ish një procedurë ligjore me këqyr sa jemi prekë, pjesa emocionale dhe nuk është që jam ndikuar aq. E kam trajtuar me avokatin”, ka deklaruar Tahiri në Këndin e Debatit në Tëvë 1.
