E ftuar në emisionin “Info Nata”, Tahiri tha se Bashkimi Evropian duke parë situatën është dashur që tashmë të thërret takimin trepalësh.
“Zgjidhja për situatën në veri nuk është një zgjidhje që nënkupton të hiqen barrikadat dhe të qetësohet, është më komplekse kërkohet një proces politik pra një dialog në Bruksel me të cilën e para pra, bëhet kthimi i minoritetit serb në institucionet e Koosvës dhe Serbia të mos i përdor ata për qëllimet e tyre gjeopolitike dhe për këtë punë Bashkimi Evropian është dashtë tashmë të thërret takimin trepalësh. Po flas nga përvoja kur kemi pasë situata të ngjashme”, tha ajo.
Tutje ajo theksoi se Qeveria e Kosovës duhet të nxjerrë mësim nga kjo situatë e krijuar me barrikadat në veri të Kosovës, e që sipas saj, të mos marrë veprime më pa u koordinuar me faktorët ndërkombëtarë.
“Qeveria e Kosovës duhet të nxjerrë mësim, pra që në të ardhmen duhet të koordinojë kur merret me zbatimin e marrëveshjeve. Siç e dini Qeveria veproi pa koordinim në çështjet e targave pastaj erdhën proceset duke u ndërlikuar një pas një dhe ndoshta Bashkimi Evropian me këtë rast po ja jep një mesazh që nëse i bëni vetëm këto hapa pa neve, atëherë ne po ju lëmë vetëm megjithëse ka pasoja kjo punë siç po e shohim që Serbia ka filluar të përdorë fjalorin e luftës. Serbia po mundohet të shfrytëzojë këtë hapësirë për të provokuar tensione dhe konflikte dhe këtu Qeveria e Kosovës duhet të jetë e matur dhe të mos bjerë në provokime”, shtoi ajo./teve1.info./
