Shefi i Grupit Parlamentar të PDK-së, Abelard Tahiri, deklaroi se sjellja e sotme e kryeministrit Albin Kurti është sulm direkt ndaj demokracisë parlamentare. Kështu u shpreh ai pasi shefi i ekzekutivit nuk i është përgjigjur pyetjeve parlamentare të opozitës pasi këta të fundit nuk po i votojnë marrëveshjet ndërkombëtare.
Në konferencë për media, Tahiri ka kritikuar qasjen e shefit të ekzekutivit ndaj deputetëve të opozitës.
“Ju e dini që pyetja parlamentare është njëri nga instrumentet e deputetit të Kuvendit të Kosovës, i cili e shfrytëzon për llogaridhënien ndaj qeverisë, në këtë rast ndaj kryeministrit, ministrat, zëvendëskryeministrat e kështu me radhë. Dhe sjellja e sotme e kryeministrit të Republikës së Kosovës, ishte një sulm direkt ndaj demokracisë parlamentare ndaj vendit tonë. Nuk ka ndodhë asnjëherë, është sjellje e paprecedent, nuk e kemi asnjë rast të vetëm ku kryeministri del dhe ju thotë deputetëve ‘që unë kam vendosur juve të mos ju përgjigjem deri në momentin kur ta bëni një veprim të tillë’”, deklaroi Tahiri.
Sipas Tahirit tendenca e kryeministrit Albin Kurti është për të instaluar diktat mbi deputetët e parlamentit.
“Po ja përkujtoj kryeministrit dhe kësaj mazhorance, e cila në vazhdimësi mundohet të instalojë njëlloj diktati që mandati i deputetit është mandat i lirë, i garantuar me nenin 70 të kushtetutës të Kosovës dhe nuk mund ta detyrojë askush deputetin e këtij kuvendi t’i nënshtrohet asnjë detyrimi nga askush. Angazhimi i tij në Kuvendin e Kosovës, qoftë për votim, qoftë për mos-votim, qoftë për pyetje parlamentare është ekskluzivisht në mandatin e tij. Angazhimet e kryeministri Kurti i kemi parë në vazhdimësi që janë angazhime për ta instaluar një lloj diktati”, shtoi ai.
Ai ka ftuar kryeparlamentarin, Glauk Konjufca, që të marrë masa ndaj njerëzve siç i quajti ai, të papërgjegjshëm.
Tahiri ka shprehur kritikat edhe për qeverisjen e deritanishme, ku sipas tij Kosova po përballet me dështime të shumta.
“Nga marsi i vitit 2021 kur kjo qeveri e ka marrë mandatin, numri i marrëveshjeve ndërkombëtare që janë votuar nga PDK në këtë kuvend arrin numrin 50, ndërsa shuma totale e këtyre marrëveshjeve është 800 milionë euro. Andaj ju e shihni që kjo qeveri nuk ka mundësi as t’i absorbojë këto mjete, t’i implementojnë këto marrëveshje për shkak të paaftësisë së tyre. Ne jemi nën masa restriksione të Bashkimit Evropian, telashet janë shumë të mëdha. E kemi një kryeministër të papërgjegjshëm po edhe të padijshëm”, përfundoi ai.
Sot gjatë seancës, kryeministri Albin Kurti ka refuzuar të përgjigjet në pyetjet parlamentare të deputetëve të opozitës. Kurti i ka thënë opozitës, që nëse duan përgjigje nga ai, duhet t’i votojnë marrëveshjet ndërkombëtare të cilat janë duke u bartur nga seanca në seancë. /kp