Deputeti i Partisë Demokratike të Kosovës ( PDK), Arian Tahiri, e ka cilësuar si të pafavorshme për Kosovën situatën e krijuar pas shtyrjes së sërishme të seancës konstituive të Kuvendit.
Tahiri ka thënë se një natë më parë është cenuar, sipas tij, rëndë rendi kushtetues, duke akuzuar Lëvizjen Vetëvendosje se po refuzon të propozojë kandidat për kryetar të Kuvendit, pavarësisht se, siç tha ai, i ka votat e nevojshme.
“LVV ka vota për ta zgjedhur kryetarin. Ata refuzojnë të propozojnë emër dhe provojnë që të prodhojnë krizë politike”, ka deklaruar Tahiri pas shtyrjes së sërishme të seancës.
Deputeti i PDK-së ka shtuar se situata e krijuar politike është pasojë e mungesës së përgjegjësisë së pushtetit ndaj qytetarëve.
“Është për keqardhje abuzimi që po u bëhet institucioneve të Kosovës nga Albin Kurti tash e 18 muaj”, ka thënë ai.
Tahiri ka theksuar se, pavarësisht ndryshimit të skenarëve politikë, sipas tij, kriza institucionale dhe politike po vazhdon.
“Vetëm po ndryshojnë skenarët, por krizë ka të vazhdueshme”, është shprehur Tahiri./teve1.info/
