Ngjarja më e madhe e Lojërave Elektronike në Evropë do të mbahet në Prishtinë në korrik të këtij viti.
Me 45 shtete pjesëmarrëse dhe me mbi 250 lojtarë, ky kampionat do të sjell në Prishtinë garat e Counter-Strike 2 dhe Dota 2.
Federata e Esports Kosova, në bashkëpunim me Federatën Evropiane të Esports, dhe Ministrinë e Kulturës, Rinisë dhe Sportit, do të organizoj Kampionatin Evropian “Esports KOSOVA 2025”.
Kryetari i Federatës së Esports Kosova Altin Preniqi, Kryeministri i vendit Albin Kurti, përfaqësues nga MKRS-ja, të Federatës evropiane dhe lojtarë të njohur nga Kosova, e zyrtarizuan organizimin më të madh të garës elektronike në vendin tonë.
Kryeministri Kurti, përmes një postimi në faqen e tij zyrtare në Facebook e bëri të ditur zyrtarizimin e kampionatit evropian, që do të mbahet në Prishtinë, në korrik të këtij viti.
“Sot në mëngjes e zyrtarizuam organizimin bashkë me Federatën Evropiane të Esports, Federatën e Esports të Kosovës dhe me Ministrinë e Kulturës, Rinisë dhe Sportit.
Urime për të gjithë gamers dhe shikuesit e Esports për këtë ngjarje të madhe. Kjo është mundësi e mirë që të shohim nga afër një organizim të jashtëzakonshëm, por edhe rast që Kosova të ketë rritje të investimeve dhe turizmit sportiv”, ka shkruar Kurti në Facebok.
Lojërat elektronike janë përhapur shpejt dhe kanë marrë interesimin e të rinjve për t’u përfaqësuar edhe ndërkombëtarisht.
