Edhe pse ka vetëm pak ditë që ka përfunduar sezoni 2025/26 në Ligën e Parë të Kosovës në futboll, te skuadra e Istogut tashmë kanë filluar të mendojnë për sezonin e ri.
Në fakt, Istogu veçse ka nisur me organizimin dhe ndërtimin e ekipit për sezonin 2026/27, në të cilin ka synime të madhe.
Sezonin e sapopërfunduar, Istogu e mbylli në pozitën e 16-të në tabelë me 31 pikë, gjë që ka aktivizuar klubin për të reaguar për sezonin e ri.
E në sezonin 2026/27, Istogu synon kreun e tabelës, duke mos përjashtuar si synim tentimin për t’u rikthyer në Superligën e Kosovës.
Te Istogu tashmë kanë dhënë paralajmërimin e parë për kundërshtarët në sezonin e ri, pasi veçse ka nisur me konfirmimin e transferimeve.
Skuadra istogase tashmë ka prezantuar Arbër Shalën, mbrojtësin që së fundmi ishte te Vëllaznimi dhe së shpejti pritet edhe zyrtarizimi i përforcimeve tjera.
E kur bëhet fjalë për përforcime, atëherë koordinatori i klubit, Mehdi Arifaj ka thënë se tashmë janë në bisedime me disa futbollistë.
“FC Istogu në sezonin e ri, synon kreun e tabelës. Jemi në bisedime me 7-8 lojtarë superior dhe gjatë ditëve në vazhdime do ti konfirmojmë dhe publikojmë të gjitha përforcimet”, është shprehur Arifaj.
