Pas paraqitjes dëshpëruese ndaj Kilit, Kombëtarja e Shqipërisë në futboll do të ketë një test të rëndësishëm.
Sot, prej orës 19:00, Shqipëria do të përballet në stadiumin “Friends Arena” në Stockholm me Suedinë, në miqësoren e dytë të këtij muaji.
Dueli me Suedinë, vjen pas humbjes nga Kili në Parma të Italisë me rezultatin 3:0, të premten e shkuar. Për Shqipërinë, kjo është ndeshja e parë e këtij viti dhe testi i parë para Evropianit, i cili nuk ishte i suksesshëm.
Megjithatë, kundër Suedisë synohet shumë më tepër nga Shqipëria, pasi kështu ka paralajmëruar selektori Sylvinho. Madje, në konferencën për shtyp, Sylvinho bëri të qartë se do të ketë edhe ndryshime në formacion pasi pret reagimin e ekipit të tij ndaj Suedisë.
Krahas Sylvinhos, edhe mesfushori Ylber Ramadani ka thënë se pret reagimin e Shqipërisë pas humbjes nga Kili. Në fakt, Ramadani ka insistuar se rezultati pozitiv kundër Suedisë do të ishte shumë i rëndësishëm. Ngjashëm sikurse Shqipëria, edhe Suedia ka pësuar humbje në miqësoren e parë të këtij viti. U mposht 5:2 në udhëtim nga Portugalia dhe sigurisht se ndaj Shqipërisë synon diçka më shumë.
Pas miqësores me Suedinë, Shqipëria i ka edhe dy ndeshje tjera miqësore në fillim të muajit qershor. Me datën 3 qershor, Shqipëria luan me Lihtenshtajnin përpara se të përballet edhe me Azerbajxhanin, katër ditë më vonë. Këto janë edhe miqësoret e fundit të Shqipërisë para Kampionatit Evropian.
Në “Euro 2024”, Shqipëria bën pjesë në Grupin B së bashku me Italinë, Kroacinë dhe Spanjën. Ndeshjen e parë në Evropian, Shqipëria e luan më 15 qershor kundër Italisë.
