Trajneri i Kombëtares së Shqipërisë, Sylvinho ka vendosur për formacionin me të cilin do të rreshtohet në ndeshjen kundër Kroacisë.
Edhe në këtë duel, Shqipëria do të luaj me formacionin 4-2-3-1, ndërsa do të ketë vetëm një ndryshim në krahasim me ndeshjen kundër Italisë.
Ndryshimi i vetëm i Sylvinhos do të jetë në krahun e majtë të treshes që do ta përkrah sulmuesin Armando Broja. Arbër Hoxha do të luaj në vend të Taulant Seferit, i cili ishte titullar ndaj Italisë, ndërsa do të startojnë edhe Nedim Bajrami e Jasir Asani.
Mesfushorët Ylber Ramadani e Kristjan Asllani do të jenë para vijës së mbrojtjes, e cila do të përbëhet nga Elseid Hysaj, Arlind Ajeti, Berat Gjimshiti e Mario Mitaj kurse në portë do të jetë Thomas Strakosha.
Ndeshja mes Kroacisë dhe Shqipërisë, luhet të mërkurën prej orës 15:00 në Hamburg dhe i takon Grupit B. Në xhiron e parë të fazës së grupeve, Kroacia pësoi 3:0 nga Spanja kurse Shqipëria u mposht 2:1 nga Italia.