Sveçla bëri të ditur se gjatë këtij takimi e falënderoi Escobarin për rolin e tij në procese të rëndësishme për Kosovën, si dhe siç bën të ditur ai, edhe për ndihmën bujare që i ka dhënë vendit ndër vite.
“Gjatë këtij takimi e falënderova z. Escobar për rolin e tij në procese të rëndësishme për vendin tonë dhe për ndihmën bujare që i ka dhënë shtetit të Kosovës ndër vite. Theksova gjithashtu nevojën për të forcuar më tej aleancën me SHBA-në në fushat me interes të përbashkët. Gjatë këtij takimi u bisedua për arritjet konkrete të Ministrisë së Punëve të Brendshme në fushën e luftimit të krimit, korrupsionit dhe terrorizmit dhe nevojën e bashkëpunimit të ngushtë për stabilitet afatgjatë në rajon dhe më gjerë. Me z. Escobar diskutuam edhe për konfliktin ndërmjet Ukrainës dhe Rusisë dhe qëndrimin e Qeverisë së Republikës së Kosovës ndaj të drejtave të popullit ukrainas si dhe gatishmërinë e qeverisë sonë për të qenë një partner i besueshëm në sigurimin e paqes dhe stabilitetit”, ka shkruar Sveçla.
Ai shtoi se Escobari ka shprehur mirënjohje për qëndrimin e Kosovës në mbështetje të Ukrainës dhe po ashtu shprehu falënderim për strehimin e përkohshëm të afganëve.
“Z.Escobar shprehu mirënjohjen e thellë për qëndrimin e Kosovës në mbështetje të Ukrainës dhe garantoi përkushtimin e tij dhe të Qeverisë së SHBA-së për të mbështetur plotësisht sovranitetin dhe integritetin territorial të Republikës së Kosovës. Ai po ashtu falënderoi Kosovën për mbështetjen e saj në strehimin e përkohshëm të qytetarëve afganë si dhe gatishmërinë e treguar nga Qeveria e Kosovës për pranimin e refugjatëve nga Ukraina”, ka shkruar Sveçla në një postim në Facebook.
Ministri Sveçla theksoi se dyshja u dakorduan që të intensifikojnë më tej bashkëpunimin mes dy vendeve drejt sundimit të ligjit në Kosovë, stabilitetit në rajon dhe unitetit për një përfundim paqësor të konfliktit në Ukrainë. /Teve1.info/
