Përmes një postimi në Facebook, ai u shpreh se çdo orë po shpërndahen informacione duke asociuar ndodhi nga e kaluara e largët dhe e dhimbshme.
“Kohëve të fundit është shtuar e zgjeruar në lloje e metoda propaganda dhe dezinformacioni nga përkrahësit dhe të punësuarit e Serbisë. Natyrisht qëllimi i tyre është për t’ju shqetësuar e shtuar pasigurinë tek ju. Për çdo orë po shpërndahen kinse informata duke asociuar ndodhi nga e kaluara e largët dhe e dhimbshme. Por të dashur bashkëqytetarë dhe bashkëqytetare, siguria e të gjithëve, pa asnjë dallim, është mision, detyrë dhe mandat i yni kushtetues e ligjor që do ta zbatojmë me përpikmëri e vendosmëri”, thuhet në postimin e tij.
Sipas tij, siguria e të gjithëve pa asnjë dallim është mision, detyrë dhe mandat i tyre kushtetues e ligjor që do të zbatohet me përpikmëri e vendosmëri.
Tutje, ai thotë se ligjshmëria dhe zbatimi i vendimeve të Qeverisë janë rruga e duhur dhe e vetme në mbrojtjen e institucioneve dhe sundimin e ligjit.
Madje, Sveçla thekson se Policia e Kosovës është e përkushtuar dhe e gatshme të ofrojë rend e siguri në vend në koordinim të ngushtë me partnerët ndërkombëtarë.
“Ligjshmëria, respektimi dhe zbatimi i vendimeve të Qeverisë së Republikës së Kosovës janë rruga e duhur dhe e vetme në mbrojtjen e frymës dhe vet institucioneve, sundimin e rendit e të ligjit dhe garantimin e sigurisë publike. Ju lus të gjithëve për bashkëpunim me përfaqësuesit e shtetit, zyrtarët policorë, solidarizim ndërshoqëror dhe ndërveprim me të gjitha institucionet e vendit tonë të cilët po kujdesen për zbatim të vendimeve tona të drejta. Ne kemi qenë gjithnjë në rrugën e drejtë si popull e shoqëri. As u kemi shkaktuar të tjerëve padrejtësi as i kemi mbështetur ato kur u kanë ngjarë popujve të tjerë. Njëjtë jemi dhe sot”, thuhet në postim./teve1.info/
