Presidentja e Republikës së Kosovës, Vjosa Osmani ka mirëpritur aktgjykimin e Gjykatës Kushtetuese dhe afatin e dhënë prej 34 ditë për zgjedhjen e presidentit.
Një një reagim pas aktgjykimit ajo u ka bërë thirrje deputetëve që urgjentisht ta “kryejnë këtë detyrim”
“Presidentja e mirëpret afatin 34-ditor të dhënë deputetëve të Kuvendit të Kosovës nga ana e gjykatës dhe u bën atyre thirrje që urgjentisht ta kryejnë këtë detyrim kushtetues. Dhënia e këtij afati shtesë nga ana e gjykatës kushtetuese asesi nuk ka qenë në kompetencën e Presidentes së Republikës. Por është pikërisht dekreti i Presidentes që e ka hapur rrugën për këtë sqarim të rëndësishëm nga ana e gjykatës si autoritet i vetëm dhe përfundimtar për të interpretuar Kushtetutën”, ka thënë Osmani thuhet në komunikatën e Presidencës.
Poashtu aty theksohet se aktgjykimi i Gjykatës Kushtetuese nuk konstaton shkelje të Kushtetutës nga e para e vendit për dekretin për shpërndarjen e Kuvendit.
“Në përputhje me komentet e dërguara nga Presidenca, edhe vetë Gjykata Kushtetuese e konfirmon në paragrafët 153, 155 dhe 190 se afati 60-ditor duhet të konsumohet para afatit 30-ditor të paraparë në nenin 86.2 të Kushtetutës, dhe se ky afat 30-ditor para përfundimit të mandatit të Presidentit aktual është përfundimtar dhe detyrues, si dhe nuk mund të relativizohet. Gjykata, në asnjë paragraf të aktgjykimit të saj, nuk ka konstatuar shkelje të Kushtetutës nga ana e Presidentes. Përkundrazi, ka konfirmuar se nuk është dekreti ai që e çon vendin në zgjedhje të reja, por është dështimi i Kuvendit për zgjedhjen e Presidentit të ri ai që i shkakton këtë proces të zgjedhjeve”, thuhet ndër të tjera.
34 ditë afat për zgjedhjen e presidentit, dështimi e dërgon vendin në zgjedhje
