Ministri i Brendshëm, Xhelal Sveçla, ka reaguar pasi që Policia e Kosovës ka njoftuar se sot në Leposaviq ka arrestuar një qytetar të nacionalitetit serb, në veturën e të cilit janë gjetur dhe konfiskuar mbi 6300 fishekë.
Sveçla ka thënë se përderisa Vuçiq flet për armatosje të Serbisë, në veri të Kosovës konfiskohen 6.300 copë municion të kontrabanduar nga Serbia.
“6.300 sasi të municionit janë konfiskuar sot nga Njësiti i Ndërhyrjes së Shpejtë të kufirit në Joshanicë, në veri të Kosovës. Gjatë patrullimit është ndaluar vetura e dyshimtë me targa të serbisë e një shtetasi serb dhe njësitet relevante tashmë kanë ndërmarrë veprimet e nevojshme”, ka shkruar ai.
Tutje ai tha se do të vazhdojnë angazhimin në luftimin e çdo lloj kriminaliteti që sipas tij, synon të cënojë sigurinë e vendit.
“Kjo rithekson sërish faktin se grupe të caktuara, të orkestruara dhe mbështetura nga Beogradi synojnë dhe angazhohen maksimalisht që të destabilizojnë vendin tonë. Do të vazhdojmë pandalshëm angazhimin tonë në luftimin e çdo lloj kriminaliteti që synon të cënojë sigurinë e vendit tonë dhe të qytetarëve tanë”, tha ai.
Ndryshe Policia e Kosovë ka njoftuar sot se është arrestuar një person me inicialet J.Zh, shtetas serb, pasi që tek i njëjti gjatë kontrollit në automjetin e tij me targa të Serbisë, ka gjetur rreth 6 mijë e 300 copë fishek.
42-vjeçari është shoqëruar në Polici dhe me urdhër të prokurorit është dërguar në mbajtje.Ngjarja ka ndodhur sot në mesditë, në fshatin Jashanicë të Leposaviqit, në një pikë kontrolli nga Njësia e Ndërhyrjes së Shpejtë e Drejtorisë Rajonale të Policisë Kufitare-Veriu./teve1.info./
https://teve1.info/lajmet/policia-konfiskon-6-mije-fisheke-arrestohet-nje-shtetas-serb/
