Hamasi ka konfirmuar vrasjen e një komandanti të lartë si pasojë e një sulmi izraelit në Gaza, duke e cilësuar atë si vrasjen me profilin më të lartë të një figure udhëheqëse të grupit palestinez që nga nënshkrimi i marrëveshjes së armëpushimit në tetor.
Ushtria izraelite ka deklaruar se ka vrarë Raed Saad në një sulm të kryer të shtunën pranë Qytetit të Gazës. Sipas njoftimeve, të paktën 25 persona të tjerë janë plagosur nga ky sulm.
Shefi i Hamasit në Gaza, Khalil al-Hayya, i cili konfirmoi vdekjen e komandantit, ka akuzuar Izraelin për shkelje të armëpushimit.
“Pas shkeljeve të vazhdueshme të Izraelit, përfshirë vrasjen e fundit të një komandanti të Hamasit vetëm dje, ne u bëjmë thirrje ndërmjetësve dhe veçanërisht administratës amerikane dhe Presidentit të SHBA-së Donald Trump si garantuesi kryesor i marrëveshjes, që ta detyrojnë pushtuesin [Izraelin] të respektojë marrëveshjen e armëpushimit dhe ta zbatojë atë”, ka thënë al-Hayya, citon Al Jazeera.
Që nga fillimi i armëpushimit më 10 tetor, Izraeli ka vazhduar të sulmojë Gazën çdo ditë – duke kryer gati 800 sulme dhe duke vrarë të paktën 386 persona.
Për më tepër, Izraeli ka refuzuar të lejojë rrjedhën e lirë të ndihmës humanitare në Gaza, duke shkelur kushtet e armëpushimit, pasi qindra mijëra palestinezë po vuajnë pas stuhisë Byron, e cila përmbyti 27,000 strehimore me tenda.
