Ministri i Punëve të Brendshme, Xhalal Sveçla, ka thënë se koha e kontrollit të veriut nga strukturat kriminale të Serbisë ka marrë fund.
Sveçla, pas aksionit të Policisë në dy lokacione në veri të vendit ku janë gjetur dhe sekuestruar dy kamera të kamufluara, e të cilat dyshet se përdoreshin për vëzhgim nga Serbia, ka thënë se mekanizmat e kontrollit dhe të spiunazhit serb në Kosovë do të luftohen me çdo kusht.
“Sot janë identifikuar dhe sekuestruar dy kamera të kamufluara në dy lokacione dhe pajisje të tjera ndihmëse të komunikimit, nga të cilat institucionet e Serbisë kanë monitoruar lëvizjet e qytetarëve, zyrtarëve të institucioneve tona të sigurisë dhe institucioneve ndërkombëtare që veprojnë në vendin tonë. Koha e kontrollit të veriut të vendit tonë nga strukturat kriminale e terroriste të Serbisë ka përfunduar. Rendi dhe ligji do të mbizotërojnë si çdo kund në Republikën tonë”, ka shkruar Sveçla në Facebook.
Policia gjen kamera vëzhguese në veri, dyshohet se përdoreshin nga institucionet e Serbisë
