Ministrja e Arsimit, Arbërie Nagavci ka thënë se mirëpret vendimin e Këshillit të Etikës dhe të Rektoratit të UP-së, për suspendimin e profesorit Xhevat Krasniqi.
Nagavci tha se asnjë shkelje nuk do të mbetet pa ndëshkuar, e në veçanti rastet që kanë të bëjnë me ngacmime seksuale, përcjell teve1.info.
“Anjë shkelje nuk do të mbetet pa ndëshkuar në universitetet tona. Ashtu siç jemi zotuar se për të gjitha sjelljet që bien ndesh me normat e kodit etik dhe kuadrin normativ, në veçanti rastet e ngacmimeve seksuale toleranca do të jetë zero! Mirëpres Vendimin e Këshillit të Etikës dhe atë të Rektorit të UP-së, Prof. dr. Qerim Qerimi. Organet përgjegjëse të Universitetit të Prishtinës, në funksion të autonomisë së tyre, e trajtuan dhe morën vendim për rastin e fundit, sepse qëllimi është i njëjtë, arsimi duhet të udhëhiqet nga kodi etikës dhe sjellja profesionale. E kundërta do të ndëshkohet gjithmonë! Shpresoj që edhe organet e hetuesisë të veprojnë me efikasitet në trajtimin e këtij rasti”, tha Nagavci në reagimin e saj në Facebook.
Më tej ministrja ka apeluar te të gjitha institucionet arsimore, të ndërmarrin hapa për të parandaluar çfarëdo shkelje të kodit të etikës, ndërsa studentët i ka inkurajuar të denoncojnë çdo rast të tillë apo shqetësim që kanë.
“Si ministre e Arsimit jam zotuar se të gjitha rastet e denoncuara nga studentët nuk do të mbetën më në arkiva dhe zvarriten pa fund nga institucionet që kanë për detyrë t’i trajtojnë ato. Bëj apel tek të gjitha institucionet arsimore, të ndërmarrin hapa për të parandaluar çfarëdo shkelje të kodit të etikës dhe të krijojnë mjedise të sigurta, ndërsa studentët i inkurajojë të denoncojnë çdo rast të tillë apo shqetësim që kanë për të ndryshuar të gjithë së bashku sistemin arsimor”, shtoi tutje Nagavci.
Ndryshe, Universiteti i Prishtinës “Hasan Prishtina” ka marr vendim që të pezulloj nga puna profesorin Xhevat Krasniqi i cili po dyshohet për ngacmim seksual ndaj studenteve.
Xhevat Krasniqi ishte denoncuar nga 27 studente të Universitetit të Prishtinës se i kishte ngacmuar seksualisht. Ndërkohë, tash e disa ditë, Lëvizja feministë ka protestuar duke kërkuar largimin e profesorit të Fakultetit të Edukimit.
Derisa zëdhënësja e Prokurorisë, Laureta Ulaj, ka konfirmuar për Tëvë1 se tashmë Prokuroria Themelore në Prishtinë ka iniciuar rast ndaj profesorit të Universitetit të Prishtinës, Xhevat Krasniqi, në drejtim të veprës penale “Ngacmim seksual”./teve1.info./
Prokuroria inicion rast ndaj profesorit Krasniqi për “ngacmim seksual”