Kandidati i Lidhjes Demokratike të Kosovës (LDK) për kryetar të Komunës së Kamenicës, Shaip Surdulli, ka ngritur shqetësime për gjendjen e rëndë me të cilën përballen qytetarët në disa sektorë jetikë, përfshirë furnizimin me ujë, shëndetësinë dhe arsimin.
Sipas tij, mungesa e ujit të pijshëm mbetet një nga problemet më të mëdha që po e prekin si qytetin ashtu edhe fshatrat e komunës.
Ai shtoi se edhe trajtim i ujërave të zeza vazhdon të jetë një sfidë serioze për banorët.
Në fushën e shëndetësisë, Surdulli tha se për vite me radhë qytetarët nuk kanë pasur qasje në shërbime të mira mjekësore, pasi vetëm tri ambulanta kanë qenë funksionale.
“Edhe pse disa ambulanta të tjera kanë qenë të ndërtuara më herët, ato nuk kanë funksionuar fare. Vetëm dje u bë inaugurimi i rinovimit të tri ambulantave që deri tani nuk kanë qenë në shërbim të qytetarëve”, tha ai në emisionin “Ditari” në Tëvë1.
Në lidhje me arsimin, kandidati i LDK-së theksoi se mbyllja e disa shkollave në mandatin e kaluar ka ndikuar negativisht në cilësinë e arsimit.
Ai shtoi se, ndonëse tashmë disa shkolla kanë rifilluar punën në lokalitete të ndryshme, numri i nxënësve është në rënie të vazhdueshme.
“Ky është një problem serioz që na preokupon. Mungojnë sallat e sportit, terrenet sportive dhe kabinetet e informatikës”, deklaroi Surdulli.
