Në Gjykatën Supreme të Kosovës po mbahet shqyrtimi i rastit të Dardan Krivaqës, i cili është dënuar me burgim të përjetshëm për vrasjen e Marigona Osmanit.
Gjatë seancës, fjalën e mori edhe vetë i akuzuari, i cili kërkoi falje për ngjarjen, duke pretenduar se veprimi nuk ka qenë i qëllimshëm dhe se në atë kohë ka qenë nën ndikimin e narkotikëve.
“Kërkoj falje për atë që ka ndodhur. Nuk ka qenë e qëllimshme, kam qenë nën ndikim të narkotikëve”, deklaroi Krivaqa.
Në shqyrtimin e rastit, para trupit gjykues u deklarua edhe Gazmend Rexhepi, avokat i familjes së Marigona Osmanit, i cili tha se dënimi me burgim të përjetshëm është i drejtë dhe i bazuar në rrethanat e rastit.
Sipas Rexhepit, viktima ka pësuar vdekje të ngadalshme dhe me vuajtje të rënda, gjë që sipas tij dëshmohet edhe nga provat e administruara gjatë procesit gjyqësor.
Ai theksoi se mizoria e veprës është konstatuar edhe përmes videoxhirimeve, ku, sipas tij, shihet qartë se të dënuarit konsumojnë ushqim dhe pije, ndërsa viktima për një periudhë të gjatë nuk ka konsumuar as ushqim e as ujë.
Rexhepi përsëriti se dënimi me burgim të përjetshëm ndaj Krivaqës është adekuat dhe në përputhje me peshën e veprës penale.
Supremja shqyrton ankesën ndaj dënimit me burgim të përjetshëm për Dardan Krivaqën
