Gjykata Supreme e Kosovës ka refuzuar kërkesën për mbrojtje të ligjshmërisë të paraqitur nga mbrojtja e të pandehurit M.M., duke lënë në fuqi vendimet e mëhershme për vazhdimin e paraburgimit në një rast që lidhet me dyshime për mashtrim dhe falsifikim dokumentesh pronësore.
Rasti ka të bëjë me dyshimet se i pandehuri, së bashku me persona të tjerë, ka kryer veprat penale “Mashtrimi i mbetur në tentativë”, “Falsifikimi i dokumentit” dhe “Legalizimi i përmbajtjes së rreme”, lidhur me një pronë në lagjen Veternik.
Sipas dosjes së lëndës, Gjykata Themelore në Prishtinë kishte vendosur vazhdimin e paraburgimit për të pandehurit M.M. dhe Zh.J. për periudhën 25 mars 2026 deri më 25 maj 2026, vendim i cili më pas ishte konfirmuar edhe nga Gjykata e Apelit e Kosovës.
Mbrojtja kishte kërkuar që masa e paraburgimit të shfuqizohej ose të zëvendësohej me arrest shtëpiak apo masa të tjera më të buta, por kjo kërkesë është refuzuar nga Gjykata Supreme.
Në arsyetimin e saj, Gjykata Supreme ka vlerësuar se ekziston dyshim i bazuar se i pandehuri mund të ketë kryer veprat penale për të cilat po zhvillohen hetimet, si dhe rrezik për arratisje, ndikim në dëshmitarë dhe bashkëpandehur, asgjësim provash apo përsëritje të veprave penale.
Gjykata po ashtu ka konstatuar se gjykatat e instancave më të ulëta kanë dhënë arsyetim të mjaftueshëm dhe se në këtë rast nuk janë shkelur dispozitat e procedurës penale./teve1.info/
