Për skuadrat e Superligës së Kosovës nuk do të ketë pushim, pasi në mesjavë do të luhet xhiro e radhës.
Në fakt, të martën dhe mërkurën do të zhvillohen pesë ndeshjet që i takojnë xhiros së 11-t të elitës së futbollit kosovar.
Të martën hapet xhiro, me dy ndeshje që do të startojnë nga ora 13:00.
Në stadiumin “Liman Gegaj”, skuadra e Malishevës e pret Ballkanin, në një ndeshje që pritet të jetë tejet interesante.
Malisheva fitoi xhiron e shkuar në udhëtim kurse Ballkani barazoi në shtëpi dhe aktualisht ka 19 pikë, gjashtë më shumë se kundërshtari i radhës.
Ndërkohë, Gjilani që ka marrë katër pikë nën drejtimin e trajnerit Debatik Curri e pret në shtëpi skuadrën e Dukagjinit.
Gjilani ka 11 pikë, tri më pak se Dukagjini, ekip që në katër ndeshjet e fundit ka regjistruar tri humbje e një barazim.
Të mërkurën, gjithashtu nga ora 13:00, do të luhen ndeshjet: Drenica – Drita, Llapi – Prishtina dhe Ferizaj – Prishtina e Re.
