Vetëm dy ndeshje do të luhen në fundjavë, në kuadër të javës së 23=të të Superligës së Kosovës në futboll.
Për shkak të ndeshjeve të Kupës në mesjavë, tri duele të kësaj xhiroje do të luhen të hënën, ndërsa dy të tjera janë të ndara të zhvillohen, një të shtunën dhe një të dielën.
Dueli i parë i kësaj jave luhet të shtunën në Gjilan, ndërmjet Dritës dhe Prishtinës së Re, duke nisur nga ora 13:00.
Gjilanasit që do të luajnë vetëm për ta mbrojtur titullin e kampionit, janë në vendin e dytë, por me pikë të barabarta sa lideri Ballkani, gjithsej, 39.
Në letër janë favoritë ndaj skuadrës debutuese në Superligë, por që Prishtina e re, pas rezultateve të mira, u largua nga fundi i tabelës me 22 pikë, lufton bashkë me katër skuadra të tjera për të mbijetuar.
Të dielën po nga ora 13:00, Drenica e cila tashmë e përmbyll renditjen me vetëm 21 pikë dhe pa fitore pesë ndeshjet e fundit kthehet në Skenderaj dhe e pret Dukagjinin e mesit të tabelës.
Të hënën, zhvillohen tri duele shumë interesante nga ora 13;00. Malisheva e pret Prishtinën, Ferizaj është nikoqir i Gjilanit dhe Llapi luan në shtëpi kundër Ballkanit.
