Për çdo hektar të mbjellur me kultura bujqësore, shteti do t’i subvencionoj bujqit dhe fermerët me nga 150 euro.
Subvencionimi vlen për një gamë të gjerë kulturash bujqësore.
Mbështetjen financiare për vitin 2026 për sektorin e bujqësisë në Kosovë, e ka prezantuar sot ministri Armend Muja.
“Arkitektura e re e mbështetjes për bujqësi përfshin tri shtylla themelore: Programi për pagesat direkte në vlerë prej 59 milionë euro. Programi për zhvillimin rural në vlerë prej 10 milionë euro. Programi i masave të stabilizimit të tregut në vlerë prej 8 milionë euro”, bëri të ditur Muja.
Ai theksoi se pjesa më e madhe e buxhetit do të shkojë për pagesa direkte të lidhura me prodhimin.
“Fillimisht, tek shtylla e pagesave direkte, rreth 20 milionë euro do t’i dedikohen sipërfaqeve të punuara. Pra, 34 milionë euro do t’i dedikohen lidhjes me prodhim pra janë skemat të lidhura me prodhim. Jo vetëm sipërfaqet e punuara, por e rëndësishme dhe e veçantë kësaj here është që skemat do të lidhen drejtpërdrejt me prodhimin për të promovuar performancë”, sqaroi Muja.
Programi parasheh edhe subvencione të drejtpërdrejta për sektorin e blegtorisë. Një krerë gjedhe do të subvencionohet me 150 euro, lopët qumështore me nga 90 euro, delet dhe dhitë me nga 25 euro, si dhe kosheret e bletëve me 20 euro.
Në sektorin e qumështit, subvencionet do të varen nga cilësia, duke nisur nga 0.02 euro për litër e deri në 0.07 euro për litër.
Ndërkaq, për prodhuesit e grurit, mbështetja do të lidhet me sasinë e dorëzuar, duke varijuar nga 0.03 deri në 0.05 euro për kilogram.
