Pas ndeshjes St. Pauli – Leipzig, Liga Gjermane e Futbollit është detyruar ta shtyjë edhe një ndeshje tjetër të xhiros së 16-të të Bundesligës. Vendimi u mor të premten pasdite.
Është shtyrë edhe ndeshja mes Werder Bremenit dhe Hoffenheimit të tre futbollistëve të Kosovës.
Sipas komunikatës së DFL-së dhe dy klubeve të përfshira, ndeshja në Bremen nuk mund të luhet “për shkak të akullit të përhapur dhe reshjeve të borës brenda dhe rreth stadiumit”.
Sipas ligës, organizimi i sigurt i ndeshjes nuk mund të garantohej për shkak të efekteve të stuhisë “Elli”.
Vetëm pak orë më herët, ndeshja mes St. Paulit dhe RB Leipzigut është shtyrë po ashtu. Si rezultat, vetëm tri ndeshje të Bundesligës do të luhen të shtunën pasdite. Ishte planifikuar të zhvilloheshin pesë ndeshje të shtunën.
Të premten në mëngjes te Werder Bremeni shpresonin se do ta organizonin ndeshjen si duhet. Klubi kishte angazhuar 50 persona shtesë për ditën e ndeshjes, në mënyrë që të pastrohet bora edhe gjatë lojës, nëse kjo do të ishte e nevojshme. Por më pas ky klub njoftoi se organizimi i ndeshjes ishte i pamundur.
“Bazuar në gjendjen momentale, nuk mund të garantohet që kushtet do të jenë në përputhje me kërkesat e Bundesligës për siguri”, ka shkruar Werder Bremeni në faqen zyrtare. Qasja në stadium është e kufizuar, ndërsa daljet emergjente dhe rrugët e lëvizjes nuk janë të sigurta për shfrytëzim.
Klubi po ashtu nuk ka mundur të garantojë udhëtim të sigurt të shikuesve për në stadium. Dhe rrjedhimisht u mor vendimi që ndeshja të shtyhet për një termin tjetër.
Fisnik Asllani, Leon Avdullahu e Albian Hajdari janë prej lojtarëve më të rëndësishëm të Hoffenheimit.
