Aleksandar Vuçiq mund të përballet me një rival serioz në garën për president të Serbisë, nëse diçka e tillë pritet të ndodh së shpejti.
Kandidati që pritet ta sfidojë kreun aktual të vendit fqinj me shtetin e Kosovës, do të ishte përfaqësues i studentëve protestues.
Përfaqësuesi i këtyre të fundit Çeda Aleksiq e ka paralajmëruar një gjë të tillë.
Duke folur për televizionin N1, ai tha se studentët e kanë diskutuar mundësinë e mbajtjes së zgjedhjeve të reja presidenciale në Serbi, një çështje për të cilën po diskutohet në opinionin publik.
“Lëvizja studentore e ka shqyrtuar mundësinë e shpalljes së zgjedhjeve presidenciale dhe në një rast të tillë do ta kishte kandidatin e vet”, tha ai në një intervistë për N1, transmeton KosovaPress.
Aleksiq foli edhe për tubimin që studentët do ta organizojnë të shtunën në Novi Sad me moton “Nuk jemi ndalur”, duke theksuar se ngjarja do të jetë tubim dhe jo protestë.
Ai tha se në këtë ngjarje do të paraqiten propozime dhe zgjidhje konkrete për çështjet që i konsiderojnë të rëndësishme, si dhe të japin vlerësimet e tyre për zgjedhjet lokale.
“Deri më tani kemi shprehur mjaftueshëm pakënaqësinë tonë. Tani është koha të ofrojmë zgjidhje se si mund të përmirësohen disa gjëra”, u shpreh Aleksiq.
Sipas tij, tubimi do të përfundojë para rënies së errësirës dhe qytetarëve do t’u kërkohet të shpërndahen qetësisht, me qëllim që të shmangen tensionet dhe incidentet.
Tubimet dhe protestat e studentëve në Serbi, që filluan para më shumë se një muaji, për shkak të një incidenti në Novi Sad, ku vdiqën 16 persona, në jo pak raste kanë qenë të dhunshme për shkak të përleshjeve të të rinjve, opozitës dhe qytetarëve anti-pushtet me forcat e rendit dhe të sigurisë.
