Kancelari i Austrisë, Christian Stocker, pas takimit me kryeministrin në detyrë të Kosovës, Albin Kurti, ka bërë thirrje për tejkalimin e krizës politike në vend dhe për përparim konkret në dialogun ndërmjet Kosovës dhe Serbisë, i lehtësuar nga Bashkimi Evropian.
Përmes një postimi, Stocker ka theksuar se Kosova mbetet një partner i rëndësishëm për Austrinë dhe Evropën, duke riafirmuar mbështetjen e Vjenës për rrugëtimin evropian të vendit.
“Kosova është një partner i rëndësishëm për Austrinë dhe Evropën, dhe ne do të vazhdojmë ta mbështesim plotësisht rrugën e saj drejt Bashkimit Evropian. Tani është koha për të kapërcyer bllokimin politik, për të çuar përpara reformat dhe për të bërë përparim të prekshëm në dialogun e lehtësuar nga BE-ja me Serbinë. Një e ardhme e qëndrueshme evropiane për Ballkanin Perëndimor mbetet qëllimi ynë i përbashkët”, ka shkruar Stocker.
