Kandidatja për deputete nga radhët e Partisë Guxo, Jeta Statovci, ka deklaruar se prezantimi i listës së Lëvizjes Vetëvendosje për zgjedhjet parlamentare të 28 dhjetorit nuk përbën ndonjë risi apo mesazh të veçantë politik.
Në emisionin “Ditari” në Tëvë1, Statovci ka thënë se fakti që në listë figuron me fotografi vetëm kandidati për kryeministër, Albin Kurti, ndërsa kandidatët e tjerë paraqiten vetëm me emra dhe numra, është thjesht një formë e ndryshme dizajni.
Sipas saj, është e qartë se Kurti është kandidati për kryeministër, ndërsa të tjerët janë kandidatë për deputetë, duke theksuar se forma të ndryshme të prezantimit janë përdorur edhe më herët.
“Shpeshherë renditjet apo dizajnet realizohen nga ekipet mediatike. Nuk shoh diçka të jashtëzakonshme, pasi edhe më parë listat janë prezantuar vetëm me emra ose në variante të ndryshme. Kjo nuk ka të bëjë me ndonjë mesazh të partisë. Është evidente se Albin Kurti është kandidat për kryeministër, kryeministri aktual, dhe ne besojmë fuqishëm se do të jetë edhe kryeministri i ardhshëm. Kandidatët e tjerë janë për deputetë. Bëhet fjalë për funksione të ndryshme dhe forma të ndryshme të dizajnit të listave”, ka deklaruar Statovci.
Ajo ka përmendur se në të kaluarën kanë ekzistuar lista të veçanta për gratë deputete dhe për kandidatët e rinj, duke shtuar se prezantimi aktual nuk dallon thelbësisht nga praktikat e mëparshme.
“Në shkurt kemi pasur një listë të veçantë vetëm për gratë deputete, si dhe një tjetër për kandidatët e rinj. Dua të them se shpeshherë kandidatët prezantohen në variante të ndryshme: ndonjëherë në renditje, herë duke veçuar kandidatin për kryeministër dhe më pas kandidatët për deputetë, e herë përmes listave të veçanta ku prezantohen vetëm gratë apo vetëm të rinjtë. Pra, ekzistojnë forma të ndryshme të prezantimit të kandidatëve tanë”, ka përfunduar ajo.
Ndryshe, Lëvizja Vetëvendosje ka publikuar të enjten listën e kandidatëve për deputetë me numrat përkatës, ku ajo që bie në sy është fakti se vetëm Albin Kurti figuron me fotografi, ndërsa të tjerët janë të paraqitur vetëm si emra dhe numra./teve1.info/
