Kryetari i Prishtinës, Përparim Rama, ka njoftuar se do të rikthehet teleferiku i parkut të Gërmisë, duke e cilësuar këtë projekt si rikthim të një ndjenje të veçantë për qytetarët dhe mundësi për brezat e ardhshëm.
“Gërmia ka qenë gjithmonë më shumë se një park, është hapësira jonë e përbashkët, frymëmarrja e qytetit dhe një potencial i pashfrytëzuar për t’u kthyer në një pistë të vërtetë skijimi dhe për sporte të tjera rekreative”, ka shkruar Rama në Facebook.
Ai bëri të ditur se në një takim të zgjeruar me përfaqësues të komunitetit sportiv, organizatave rekreative dhe institucioneve relevante janë diskutuar hapat konkretë për realizimin e projektit, i cili po merr tashmë trajtë zhvillimore.
Rama ka theksuar se çdo hap do të ndërmerret me kujdes maksimal për të ruajtur statusin e zonës së mbrojtur, në përputhje me standardet mjedisore dhe kornizën ligjore në fuqi.
Ai gjithashtu bëri me dije se po punohet ngushtë me institucionet qendrore për krijimin e bazës ligjore dhe teknike të nevojshme për realizimin e projektit.
“Një zhvillim i madh është në horizont”, ka përfunduar Rama./teve1.info/
