Jeta Statovci nga Lista Guxo ka deklaruar se Nisma Socialdemokrate nuk do të arrijë ta kalojë pragun zgjedhor në zgjedhjet e parakohshme parlamentare që do të mbahen më 28 dhjetor.
Duke folur në emisionin “Mesditë” në Tëvë1, ajo ka thënë se rezultatet e zgjedhjeve të kaluara si dhe paraqitja e fundit e Nismës janë dëshmi se kjo parti nuk ka mbështetje të mjaftueshme elektorale.
“E vetme nuk e shoh që do të mund ta kaloj pragun. Kemi referencë në të kaluarën, kemi edhe rezultatin e zgjedhjeve të fundit, ku bashkë me AAK-në dhe një varg parti të tjera mezi e kaluan pragun. Qëndrimet e fundit janë më shumë të egos dhe të refuzimit sesa të përmbajtjes dhe arsyes politike”, deklaroi Statovci.
Ajo ka shtuar se edhe pse mund të ketë qenë më e lehtë që Lëvizja Vetëvendosje të pranonte kërkesat e Nismës, sipas saj ky subjekt politik nuk po gjen qetësi asnjëherë në raport me partnerët potencialë.
“Më e lehta do të kishte qenë që ne të lëshojmë pe, mirëpo Nisma po e shohim që nuk po e gjen rehatinë e vet me asnjë nga taborët politikë. Ajo nuk arriti të ketë bashkëpunim të mirëfilltë as me AAK-në, e as me ne, ku kishim një varg mundësish për bashkëpunim edhe në institucione. Kjo nënkupton që nuk kemi të bëjmë me parime politike, por me taktizime për të ardhur në pushtet”, u shpreh ajo./teve1.info/
