Deputeti i Partisë Demokratike të Kosovës (PDK), Enver Hoxha, ka shprehur një hapje të mundshme për bashkëpunim me Lëvizjen Vetëvendosje (LVV), gjatë një interviste të dhënë në një prej televizioneve vendore ditën e djeshme.
Në lidhje me këtë çështje ka reaguar edhe deputetja e LVV-së, Jeta Statovci, e cila në emisionin “Mesditë” në Tëvë1 ka theksuar se Vetëvendosje ka qenë e hapur për koalicion dhe bashkëpunim me subjektet e tjera politike pas procesit zgjedhor.
“Ne kemi qenë mjaftë transparentë në hapat që kemi marrë pas propozimit për kryeparlamentare, e cila nuk arriti të marrë votat. Pas kësaj kemi bërë thirrje për dakordim rreth procedurave me subjektet politike. LDK-ja nuk është përgjigjur, ndërsa PDK-ja ka dhënë një përgjigje, por nuk pati rezultat konkret,” tha Statovci.
Sipas saj, LVV kishte parë LDK-në si partnerin më të afërt politik dhe elektoral, por ishte pikërisht LDK-ja ajo që kishte refuzuar një bashkëpunim potencial.
Megjithatë, Statovci theksoi se një bashkëpunim me PDK-në është i vështirë për shkak të dallimeve të thella politike.
“Botët tona politike me PDK-në janë shumë të largëta. Për të pasur një bashkëpunim me PDK-në, duhet të kemi edhe një afërsi në botëkuptimet politike, gjë që për momentin mungon,” u shpreh ajo.
Ky debat vjen në një kohë të pasigurt politike në vend, ku subjekte të ndryshme po shqyrtojnë opsione të reja për krijimin e shumicës parlamentare.
