Graham Potter është në buzë të greminës. Aventura e tij me Chelsean mund të përfundojë shumë më shpejt nga sa e kishte menduar tekniku britanik. Disfata e së shtunës në shtëpi ndaj Aston Villa-s me rezultatin 0-2, ka rikthyer edhe njëherë kritikat e ashpra ndaj Potter.
Së fundmi, edhe tifozët në Stamford Bridge janë sinkronizuar dhe në kor u dëgjuan teksa thërrisnin në Stamford Bridge kundër teknikut të Bluve të Londrës. “Potter ti nuk e ke idenë se çfarë po bën me skuadrën”, ishin thirrjet e tifozerisë së Chelsea. Sakaq, nuk munguan edhe kontestimet në formën e vërshëllimave për ekipin dhe trajnerin 47-vjeçar.
Aktualisht, Chelsea renditet në vendin e 11-të të Premier League me 38 pikë dhe pas disfatës me Aston Villa-n duket se për Blutë e Londrës është shuar çdo shpresë për të mbërritur në vendin e katërt në fundin e sezonit. Ndeshja e radhës është sërish një test për Chelsean teksa pret në shtëpi Liverpoolin e Jurgen Klopp.
