Rreth 520,000 njerëz u mblodhën herët të enjten, në Ditën e Vitit të Ri, në Urën e Galatës në Stamboll për një marshim masiv në mbështetje të Palestinës, i organizuar nga Aleanca e Humanitetit dhe Platforma e Vullnetit Kombëtar.
Demonstrata, me pjesëmarrjen e mbi 400 organizatave të shoqërisë civile dhe e udhëhequr nga Fondacioni Rinor Turk (TUGVA), u zhvillua nën sloganin “Nuk do të trembemi, nuk do të heshtim, nuk do ta harrojmë Palestinën”, me thirrje për t’i dhënë fund gjenocidit në Gaza.
Para ngjarjes, qytetarët u mblodhën për lutjet e agimit në xhamitë kryesore të Stambollit, përfshirë Shën Sofinë, Sultanahmetin dhe Sulejmanijen, duke mbajtur flamuj turq dhe palestinezë.
Pavarësisht temperaturave të ulëta, pjesëmarrja ishte e lartë dhe u morën masa të shtuara sigurie.
Pas lutjes së mëngjesit, demonstruesit marshuan drejt Urës së Galatës, të shoqëruar nga ministra dhe zyrtarë të lartë. Programi nisi në orën 8:30 të mëngjesit.
Duke folur për mediat, kryetari i Bordit të Administratorëve të Fondacionit Ilim Yayma dhe anëtar i Bordit të Lartë Këshillimor të TUGVA-s,Bilal Erdogan tha se viti i ri kishte nisur me lutje për Palestinën dhe theksoi rëndësinë shpirtërore të tubimeve në xhami.
“Nga njëra anë, ne po lutemi për të shtypurit në Palestinë. Nga ana tjetër, sigurisht, po përkujtojmë martirët tanë. Në të njëjtën kohë, ne po lutemi së bashku që viti 2026 të sjellë mirësi për të gjithë kombin tonë dhe për palestinezët e shtypur”, tha ai.
