Shefi i Grupit Parlamentar të AAK-së, Besnik Tahiri, ka deklaruar se në vend tashmë po ndihet qartë atmosfera zgjedhore.
Përmes një postimi në Facebook, ai ka theksuar se dita e mërkurë ka qenë dinamike, por njëkohësisht, sipas tij, tregues se institucionet po funksionojnë në kuadër të përgatitjeve për zgjedhje.
Tahiri ka kritikuar qasjen e Grupit Parlamentar të Lëvizjes Vetëvendosje, duke thënë se çdo iniciativë e opozitës po refuzohet. Ai përmendi edhe mosfutjen në rend dite të rezolutës për vlerat e lirisë, duke e cilësuar këtë si standard të dyfishtë dhe mungesë vullneti politik.
Sipas tij, këto veprime nuk janë të rastësishme, por lidhen me kalkulime elektorale.
“Në Kryesi, qasja e GP të VV-së ishte e ngurtë, pasi çdo iniciativë e opozitës po refuzohet. Rezoluta për vlerat e lirisë nuk u fut në rend dite si pikë e parë, qëndrim i pabesueshëm dhe dëshmi e standardeve të dyfishta. Kjo mungesë vullneti nuk është rastësi, por reflektim i kalkulimeve elektorale. Ndërkohë, proceset formale vazhdojnë: intervistimi për Gjykatën Kushtetuese përfundoi me 6 emra për seancë, ndërsa në Komisionin për Legjislacion u vendos që të martën të intervistohen 23 kandidatët për KGJK-në”, ka shkruar ai. /teve1.info/
