Spitali i Përgjithshëm në Pejë ka bërë një apel publik ndaj institucioneve përgjegjëse, duke kërkuar ndërhyrje urgjente për zgjidhjen e problemit të largimit të mbeturinave, situatë që, sipas tyre, po rrezikon funksionimin normal të spitalit dhe sigurinë e pacientëve, stafit shëndetësor dhe qytetarëve.
Në reagimin e spitalit thuhet se si institucion që ofron shërbime shëndetësore 24 orë në ditë, çdo ditë prodhohen sasi të konsiderueshme mbeturinash, të cilat nuk mund të qëndrojnë për një kohë të gjatë brenda hapësirave të spitalit pa rrezikuar kushtet higjieno-sanitare dhe pa shtuar mundësinë e përhapjes së infeksioneve.
Drejtuesit e spitalit shprehen se e kuptojnë situatën e krijuar lidhur me deponinë e mbeturinave, por kërkojnë nga institucionet lokale dhe qendrore të ndërmarrin masa të menjëhershme për të garantuar largimin e rregullt të mbeturinave nga spitali.
“Nuk kërkojmë trajtim të privilegjuar, por trajtim prioritar për një institucion që ofron shërbime jetike dhe që, për shkak të natyrës së veprimtarisë së tij, nuk mund të funksionojë në kushte ku largimi i mbeturinave ndërpritet”, thuhet në reagim.
Spitali thekson gjithashtu se i ka përmbushur rregullisht të gjitha obligimet kontraktuale dhe financiare ndaj kompanisë përgjegjëse për grumbullimin dhe largimin e mbeturinave, duke shtuar se situata aktuale nuk është rezultat i veprimeve apo mosveprimeve të institucionit.
Në fund të reagimit, Spitali i Përgjithshëm në Pejë u bën thirrje institucioneve kompetente që ta trajtojnë çështjen me prioritet, me qëllim mbrojtjen e shëndetit publik dhe sigurimin e vazhdimësisë së shërbimeve shëndetësore./teve1.info/
