Ministri i Jashtëm i Spanjës, Jose Manuel Albares, i kërkoi të martën Bashkimit Evropian të ndërmarrë masa të drejtpërdrejta ndaj Izraelit, për shkak të përkeqësimit të situatës humanitare në Rripin e Gazës. Ai e përshkroi gjendjen si “të paqëndrueshme, të padurueshme dhe çnjerëzore”.
Duke folur përpara takimit të ministrave të jashtëm të BE-së në Bruksel, Albares theksoi se blloku evropian duhet të përdorë “të gjitha mjetet në dispozicion” për të rritur presionin diplomatik ndaj Izraelit, raportoi e përditshmja spanjolle El País.
“BE-ja duhet të bëjë gjithçka që ka në dorë për ta ndalur këtë luftë dhe për të garantuar që ndihma humanitare të arrijë pa pengesa,” tha ai.
Sipas Albarezit, koha për deklarata dhe thirrje ka përfunduar: “Kemi muaj të tërë që bëjmë apele. Tani është koha për veprim. Nuk mund të tolerojmë më as edhe një minutë këtë situatë.”
Ai konfirmoi se i ka dërguar një letër shefes së politikës së jashtme të BE-së, Kaja Kallas, duke përsëritur kërkesën e Spanjës për një shqyrtim zyrtar të Marrëveshjes së Asociimit mes BE-së dhe Izraelit — një nismë që fillimisht ishte ndërmarrë nga Spanja dhe Irlanda më shumë se një vit më parë.
Kësaj thirrjeje i janë bashkuar edhe Irlanda, Sllovenia dhe Luksemburgu. Ndërkohë, Holanda ka kërkuar në mënyrë të veçantë rishikimin e pajtueshmërisë së Izraelit me Nenin 2 të marrëveshjes, i cili përcakton se marrëdhëniet ndërmjet palëve duhet të bazohen në respektimin e të drejtave të njeriut dhe parimeve demokratike.
