Trajneri i Italisë, Luciano Spalletti do të bëjë disa ndryshime në formacionin e tij për ndeshjen kundër Zvicrës.
Italia dhe Zvicra do të përballen në 1/8 e finales të “Euro 2024”, ndeshje kjo që luhet të shtunën në Berlin prej orës 18:00.
Mediumet italiane kanë raportuar se Spalletti tashmë ka në mendje formacionin me të cilin beson se mund ta eliminoj Zvicrën.
Ndryshimi i parë i Spallettit është në mbrojtje, ku trajneri italian është i detyruar ta zëvendësoj Riccardo Calafiorin e suspenduar me Gianluca Mancinin.
Në mesfushë, startues pritet të jetë edhe Nicolo Fagioli ndërsa në repartin e sulmit, Gianluca Scamacca do të rikthehet titullar pasi Spalletti po e preferon para Mateo Reteguit për këtë ndeshje të rëndësishme.
Po ashtu, titullar tek Italia do të jetë edhe Federico Chiesa, i cili në ndeshjen e fundit ndaj Kroacisë ishte reservist pasi në pozitën e tij u aktivizua Giacomo Raspadori.
