Profesori universitar, Nexhmedin Spahiu ka thënë se zgjidhja për dalje nga kriza institucionale pas dështimit të konstituimit të Kuvendit, është anulimi i aktgjykimit të Gjykatës Kushtetuese të vitit 2014, e cila i kishte dhënë të drejtën partisë fituese të zgjedhjeve të drejtën e kryetarit të Kuvendit.
Ai ka thënë se do të ishte i befasuar për të mirë nëse gjykata e bënë këtë vendim.
Spahiu në emisionin “InfoNata” ka dhënë dy opsione se si duhet të zgjidhet kryetari i Kuvendit për të eliminuar kriza të tjera.
“Zgjidhja do të ishte anulimi i vendimit të vitit 2014, të thuhet që ky ishte një gabim që e solli këtë ngërç pas 11 vitesh. Ose me marrë vendimin që partia e parë e zgjedh kryeparlamentarin dhe nuk ka nevojë që të votohet, ose duhet të votohet kryeparlamnetari në mesin e shumë kandidatëve ai që i fiton shumicën e votave”, ka thënë Spahiu.
Megjithatë, ai ka thënë se nuk pret që Gjykata Kushtetuese të marrë një vendim të tillë, por sipas tij vendi që mund të merret është ai për dërgimin e vendeve në zgjedhje të reja.
“Pres me bë një veprim të palogjikshëm dhe ai është me dërgua vendin në zgjedhje. Ai nuk e nxjerr vendin nga kriza. P.sh, Vetëvendosje del përsëri partia e parë, por më me pak deputet… Dhe në bazë të këtij precedenti vendi shkon përsëri në zgjedhje. Unë shpresoj që të mos ketë vendim për shkuarje në zgjedhje. Nuk shohë që zgjedhjet e reja të sillnin një situatë të re pos kësaj që kemi tani”, ka thënë Spahihu.
26 korriku ka qenë afati i fundit i konstituimit të Kuvendit sipas afatit 30 ditor që kishte dhënë Gjykata Kushtetuese.
Nga data 27 korrim e deri më 8 gusht deputetët nuk ka të drejtë të marrin asnjë veprim sipas masës së përkohshme që ka vendosur Kushtetuesja.
