Fermerët kosovarë të qumështit do të protestojnë sot, duke filluar nga ora 13:00, para Ministrisë së Bujqësisë, pas ndërprerjes së grumbullimit të qumështit të freskët, situatë që, sipas tyre, po rrezikon seriozisht mbijetesën e fermave.
Vendimi për organizimin e protestës u mor unanimisht nga Shoqata e Fermerëve Kosovarë të Qumështit në mbledhjen e mbajtur më 5 korrik. Ata thonë se janë detyruar të dalin në protestë pasi, sipas tyre, institucionet përgjegjëse nuk kanë reaguar ndaj shqetësimeve të tyre.
“Protesta është e pashmangshme me situatën e krijuar për mosgrumbullimin e qumështit të freskët nga fermat tona, duke hasur në vesh të shurdhër tek akterët kompetentë”, thuhet në reagimin e shoqatës.
Fermerët kanë paraqitur tri kërkesa kryesore:
Rifillimin e menjëhershëm të grumbullimit të qumështit të freskët;
Publikimin urgjent të rezultateve të analizave, për të larguar çdo dyshim mbi cilësinë e produkteve vendore;
Rikthimin e çmimit të mëparshëm të qumështit, me qëllim shmangien e falimentimit të fermave.
Në shenjë pakënaqësie, protestuesit do të marrin pjesë me mjete bujqësore dhe cisterna të mbushura me qumësht. Ata kanë ftuar edhe qytetarët që t’u bashkohen protestës duke sjellë bidonë, pasi gjatë tubimit do të shpërndahet qumësht falas.
