Për të enjten (sot, 17:00) është paralajmëruar Kuvendi Zgjedhor i Federatës së Karatesë së Kosovës, ashtu si ka kërkuar MKRS-ja pas pezullimit të licencës së kësaj federate. Kuvendi është thirrur nga Avni Gashi, që përfaqëson njërin grup të klubeve të karatesë. Grupi tjetër, që përfaqësohet nga Nazmi Gashi dhe Besart Baruti, nuk e vlerëson legjitime thirrjen e Kuvendit nga Avni Gashi. Qëndrim të njëjtë ka edhe Komiteti Olimpik i Kosovës.
Ndërkohë përfaqësuesit e MKRS-së pritet të jenë prezent në Kuvend dhe kjo me shumë mundësi do të legjitimojë vendimet që merren në të. Por ka dyshime për parregullsi të shumta në prag të Kuvendit.
Avni Gashi përmes një postimi në “Facebook” ka shkruar se “kanë filluar intervenimet direkte nga udhëheqës të politikës e të institucioneve sportive, e po ashtu nga biznesi e familjarë për të sabotuar kuvendin”.
Me komente në postimin e tij është përfshirë Afrim Latifi, që ka lënë të kuptohet se presioni po bëhet ndaj njërës prej karateisteve më të mira në vend, Fortesa Orana. Latifi ka publikuar edhe një porosi që ia ka dërguar Besart Barutit përmes të cilit ka kërkuar që mos t’i bëhet presion karateistes në fjalë. Zhvillime priten gjatë kuvendit, por edhe pas tij.
