Në Gjykatën Themelore në Prishtinë pritet të mbahet sot gjykimi në mungesë ndaj 21 të akuzuarve, të cilët Prokuroria Speciale i ngarkon me veprën penale “krime lufte kundër popullatës civile”, në lidhje me dëbimin e qindra mijëra shqiptarëve nga Kosova gjatë luftës së vitit 1999.
Procesi gjyqësor do të zhvillohet në mungesë të të akuzuarve, ndërsa përgjegjësia e tyre penale do të përcaktohet nga gjykata, në bazë të provave të paraqitura dhe procedurave të zhvilluara gjatë gjykimit.
Sipas aktakuzës, gjatë periudhës janar–qershor 1999, të akuzuarit kanë ushtruar autoritet dhe kontroll efektiv mbi forcat që vepronin nën përgjegjësinë e tyre gjatë konfliktit të armatosur në Kosovë.
Prokuroria pretendon se të akuzuarit, përmes raporteve operative, komunikimeve të brendshme dhe pranisë në terren, kanë qenë në dijeni për veprimet e ndërmarra nga forcat nën komandën ose kontrollin e tyre.
Sipas aktakuzës, këto veprime kanë rezultuar në organizimin e kolonave të detyruara të civilëve shqiptarë, me qëllim dëbimin e tyre nga Kosova drejt kufirit me Shqipërinë dhe Maqedoninë e atëhershme.
Në aktakuzë përmendet shifra prej 862 mijë e 979 civilësh shqiptarë të dëbuar gjatë kësaj periudhe.
Prokuroria pretendon gjithashtu se të akuzuarit nuk kanë ndërmarrë masat e nevojshme dhe të arsyeshme, brenda kompetencave dhe përgjegjësive të tyre, për të parandaluar këto veprime, për t’i penguar autorët apo për t’i raportuar veprat e kundërligjshme tek autoritetet përkatëse.
