Analisti politik, Avdi Smajljaj, ka kritikuar ashpër bllokadën politike që ka çuar në dështimin për konstituimin e institucioneve të reja, duke vënë në pah koston që kjo po i shkakton qytetarëve të Kosovës.
Në emisionin “Info Nata” në Tëvë1, ai theksoi se vazhdimi i kësaj situate është e pajustifikueshme. .
“Në mënyrë hipotetike mbahen zgjedhjet e reja, përsëriten në një mënyrë ato të shkurtit, për shkak të kohës – rezultati është përafërsisht i njëjtë dhe partitë vendosin të bëjnë koalicione, po këto parti që janë. Çfarë do t’i thonë qytetarit që ia humbën gati një vit me këtë bllokadën, pse mos të bëjnë tani koalicion, por duhet pritur me muaj”, deklaroi ai.
Smajljaj theksoi se nëse rezultati eventual i zgjedhjeve të reja mbetet i pandryshuar, atëherë partitë politike do ta kenë të pamundur ta justifikojnë bllokimin institucional para qytetarëve.
“Në rast se prapë është rezultati i njëjtë, si mund të justifikohet te qytetari që ia humbën një vit? Partitë duhet ta kuptojnë që nuk është çështje dashurie mes partive, është çështje e fakteve, realitetit që koalicioni është i domosdoshëm”.
Sipas tij, zgjidhja më e mirë për t’u dalë zot situatës është ndërtimi i një koalicioni të ri qeverisës, sa më shpejt që është e mundur.
“Zgjidhja më e mirë do të ishte të formohej tashmë një koalicion, që mos të maltretohet qytetari prapë”, përfundoi Smajljaj.
