Politologu, Avdi Smajljaj duke komentuar premtimin e AAK-së dhe partnerëve tjerë të Koalicionit për “Kosovën Fituese” për anëtarësim në NATO, ka thënë se mund të ketë disa pengesa.
Ai e vlerëson si barrierë dhe zor të kalueshme, faktin se 4 vende anëtare të NATO-s nuk e njohin e Kosovën.
“Janë disa barriera të pakalueshme, sidomos njohja e katër shteteve anëtare të NATO-së, duke pas parasysh se në bazë të statutit NATO-së, aty anëtarësohen shtetet”, ka thënë ai në emisionin “Këndi i Debatit” në Tëvë1.
Por, kandidati për deputet nga AAK, Ahmet Isufi është shprehur i bindur se anëtarësimi në NATO do të ndodhë nëse ata vijnë në qeveri.
Ai ka thënë se katër vendet anëtare në NATO që nuk e njohin Kosovën mjafton të mos votojnë kundër, siç ka ndodhë në disa raste.
“Anëtarësimi në NATO bëhet. Shtetet që kanë fuqi vendimmarrëse brenda NATO-s, janë që të ndodhë një gjë e tillë. Mjafton vendet mosnjohëse që janë 4 që vetëm të mos kundërshtojnë e kjo ka ndodhë në raste të caktuara në disa vendime për Kosovën. Kosova do të jetë në NATO në momentin që udhëheqim me Qeverinë”, ka thënë Isufi.
