Politologu, Avdi Smajljaj vlerëson se vendimi i Gjykatës Supreme sipas së cilit nxjerrja e akteve nënligjore apo udhëzimeve administrative nga ministrat që janë deputetë është e kundërligjshme dhe shkel dispozitat kushtetuese ka sqaruar shumë paqartësi ligjore.
Sipas Smajljajt, pavarësisht diskutimeve mbi profesionalizmin e gjykatës apo mundësinë e politizimit, vendimi i Supremes është fjala e fundit e sistemit gjyqësor dhe duhet të respektohet.
“Kjo që doli sot nga Gjykata Supreme besoj se i ka sqaruar shumë gjëra që ndoshta ka qenë ndonjë dilemë se edhe Ligji për Qeverinë sikur ishte pak kundërthënës. Këtë vendim ne mund ta kontestojmë e ta diskutojmë sa duam për shembull profesionalizmin sa ka qenë korrekt ose sa është gjykata e politizuar, por megjithatë është fjala e fundit në hierarkinë e gjykatave, duke e përjashtuar Gjykatën Kushtetuese”, ka thënë ai në emisionin “Këndi i Debatit” në Tëvë1.
Ndërkohë, kundërshtimin e Qeverisë ndaj vendimit të Gjykatës Supreme e ka cilësuar sfidë serioze për institucionalizimin e shtetit të Kosovës.
“Kjo përballje e çon vendin drejt një anarkie. Gjykata Supreme e përmend konfliktin e interesit që problemi është se ai në të njëjtën kohë ka qenë edhe deputet edhe ministër një gjë që ndoshta ka qenë dilemë, pra është fjala e fundit e sistemit gjyqësor. Çka nëse secili qytetar fillon dhe nuk i zbaton vendimet e gjykatës? Ku e çon kjo vendin? E çon drejt anarkisë. Qeveria me këtë sfidim, me këtë mendësi të përballjes me institucione të tjera është duke e sfiduar institucionalizimin e shtetit të Kosovës. Shteti ka një lloj hierarkie që të bie mirë ose të bie keq duhet të respektohet”, është shprehur Smajljaj.
Qeveria e kundërshton vendimin e Supremes, e cilëson arbitrar dhe të njëanshëm
Supremja: Ministrat që janë edhe deputetë nuk mund të nxjerrin akte nënligjore
