Selektori i Kombëtares së Sllovenisë, Matjazh Kek pak para nisjes për në Prishtinë, ka thënë se ekipi i tij ka planin për ta mposhtur Kosovën.
Sllovenia është mysafire e Kosovës në ndeshjen kualifikuese për Botërorin 2026, e cila luhet të premten mbrëma në stadiumin “Fadil Vokrri”.
Selektori Kek ka pranuar forcën e Kosovës, por ka thënë se Sllovenia synon fitoren që do të ishte e para në këtë cikël kualifikues, në të cilin ka vetëm një pikë të tubuar pas dy ndeshjeve të luajtura.
“Jemi të vetëdijshëm për forcën e Kosovës. Bëhet fjalë për një ekip shumë kompakt, agresiv dhe me disa individë të shkëlqyer. Kemi përgatitur një plan pasi duhet ta rregullojmë atë që shkoi keq në Zvicër. Duam të fitojmë çdo ndeshje dhe atmosfera në Prishtinë duhet të jetë një motiv shtesë për ne”, ka deklaruar Kek.
Sllovenia të premten mbrëma ka mbajtur stërvitjen në stadiumin “Fadil Vokrri”, si dhe konferencën për shtyp, në prag të përballjes me Kosovën.
