Skitarja e Kosovës, Kiana Kryeziu të enjten ka bërë debutimin e saj në Lojërat Olimpike Dimërore “Cortina-Milano 2026”.
Kryeziu nuk arriti ta përfundojë garën e saj të parë në disiplinën Super-G, pasi doli nga shtegu.
Kryeziu ishte garuesja e parafundit që bëri lëshimin në këtë garë, e cila ishte e para në Lojërat Olimpike Dimërore për skitaren e Kosovës.
Pas kësaj disipline të skijimit alpin, Kryeziu do ta përfaqësojë Kosovën edhe në sllallom të madh dhe sllallom, gara këto që do të mbahen më datën 15, përkatësisht 18 shkurt.
Kosova në këtë ngjarje përfaqësohet edhe nga skitari Drin Kokaj, i cili do të paraqitet në disiplinën e sllallomit, garë kjo që do të mbahet më 16 shkurt.
Për Kosovën, kjo është hera e tretë që paraqitet në Lojërat Olimpike Dimërore, ndërsa përfaqësohet me skitarët Kryeziu e Kokaj.
