Disa herë u takuan në Kuvendin e Kosovës.
E të hënën, e bënë përpjekjen e fundit për një marrëveshje politike rreth çështjes së presidentit të vendit.
Por kryeministri Albin Kurti dhe kryetari i Lidhjes Demokratike të Kosovës, Lumir Abdixhiku, sërish dolën nga takimi pa marrëveshje.
“Ofruam që ta ketë zëvendëskryeministrin e parë, Ministrinë e Punëve të Jashtme dhe tri ministri të tjera. Unë kam preferuar që zëvendës imi të bëhet z.Abdixhiku dhe të fillojmë një kapitull të ri. Ne kemi propozuar që të ndërrojnë vendet nënkryetari i LDK-së me kryetaren e Kuvendit nga LVV”, u shpreh Kurti.
Shefi i Qeverisë tha se LDK-ja nuk ka pasur ndonjë propozim për emrin e presidentit.
Në këto rrethana, propozimi i partisë së tij, Kurti tha se mbetet i pandryshuar.
“Unë nuk mund të bëhem më LDK se LDK-ja. Nuk ka mundësi të ofroj unë diçka që ata nuk më kanë thënë se e kërkojnë. Ne ua kemi propozuar opozitës dikë që e duan më shumë se mua, Konjufcën. Ai është njeriu i dytë më i votuar në Kosovë”, tha ai.
E i pari i LDK-së, Lumir Abdixhiku, tha se Kurti edhe në takimin e sotëm e vazhdoi insistimin se Vetëvendosjes i takon Presidenti.
“Insistonte që pozita e presidentit t’i mbetet Vetëvendosjes. Ne ishim në diskutim për çështjen e presidentit dhe unë refuzova të flas për çështje tjera pa folur për emrin e presidentit. Nuk kemi diskutuar për asnjë emër me LVV-në për presindeitn, përveç Glauk Konjufcës dhe për këtë e dini qëndrimin tonë”, tha Abdixhiku.
Sipas Abdixhikut, nuk ka më vend për takime dhe vendi po shkon drejt zgjedhjeve të reja.
“Nuk kemi kërkuar asnjë pozicion për LDK-në e as për mua. Me kaq, në këto rrethana LDK nuk mund të bëjë më shumë. LDK-ja e lë të hapur diskutimin me partitë tjera. Nuk kemi dëgjuar asnjë propozim tjetër përveç që presidenti të jetë i Vetëvendosjes. LDK-ja e konsideron këtë çështje të mbyllur që nga ky moment”, ka theksuar Abdixhiku. “Do të bëhemi gati për skenarin më të keq, më të rëndë e më të pakuptueshëm të zgjedhjeve të reja dhe të jashtëzakonshme. Nga fillimi parimet kanë qenë të qarta, presidenti i Kosovës nuk mund të jetë zgjatim i Qeverisë”, tha ai.
Pas takimit me Abdixhikun, Kurti e konfirmoi se i shkroi mesazh për takim edhe kryetarit të PDK-së, Bedri Hamza.
