Konferenca e organizuar Fondacioni Friedrich Ebert në Prishtinë, i mblodhi përfaqësuesit shtetëror të Kosovës, diplomatë evropian si dhe akterë të ndryshëm nga shoqëria civile.
Këtë konferencë e hapi, kryeministri i vendit, Albin Kurti.
Shefi i qeverisë, para medieve foli sërish për rrezikun që paraqet Serbia në rajon, andaj sipas tij duhet t’i jepet shtysë Kosovës drejt integrimit evropian, si përgjigje ndaj kërcënimeve të sigurisë.
“Mungesa e përparimit në anëtarësimin e Kosovës në BE dhe Këshillin e Evropës nuk kanë të bëjnë me mungesën e demokracisë dhe mbrojtjes së fortë të të drejtave të minoriteteve dhe të drejtave të njeriut, por në sjelljen e një regjimi autoritar sepse Serbia nuk është e interesuar për anëtarësim në NATO apo BE. Ajo kërkon të bllokojë përparimin e gjithë rajonit, duke frenuar të gjithë rajonin”, tha Kurti.
E kryetari i Kuvendit të Kosovës, Glauk Konjufca, ka vlerësuar se rajoni dhe Evropa janë në një periudhë të rëndësishme dhe kritike për paqen dhe sigurinë.
Se situata e sigurisë vazhdon të jetë e ndjeshme në rajonin e Ballkanit Perëndimor, e thotë edhe ish-ministri i Punëve të Jashtme të Shqipërisë, Ditmir Bushati.
Ai përmendi tensionet mes Kosovës dhe Serbisë që kulmuan me 24 shtator, ku u vra rreshteri Afrim Bunjaku nga një formacion terrorist.
Kurse eurodeputeti, Lukas Mandl, thotë se i takon Kosovës dhe Serbisë që të bëjnë më shumë për t’i normalizuar marrëdhëniet, megjithatë ai thotë se edhe BE mund ta ndërmjetësoj më mirë këtë proces.
“I takon Kosovës dhe Serbisë që të flasin shtruar për problemet që ato kanë më njëra tjetrën, në mënyrë që të arrihen rezultate. Por edhe Bashkimi Evropian mund ta ndërmjetëoj më mirë këtë proces, ka hapësira për përmirësime. Unë do t’i dërgoj disa rekomandime në Parlamentin Evropian, për këtë çështje”, tha eurodeputeti.
Ndërkaq, analisti politik, Alejandro Esteso Perez, thotë se Serbisë nuk i bëhet vonë për një marrëveshje finale me Kosovën dhe se po pret rrethana të tjera më të mira për ta bërë një gjë të tillë.
“Serbia është shumë komode me situatën aktuale politike. Serbia preferon status-quo sepse është anëtare e plotë e shumë organizatave ndërkombëtare dhe njihet ndërkombëtarisht. Pra Serbia po vazhdon ta bllokoj Kosovën dhe synon të blej më shumë kohë derisa të krijohen rrethana të tjera gjeopolitike ku mund të përfitoj diçka më shumë. Në anën tjetër Kosova ka nevojë shumë më shumë për Bashkimin Evropian, prandaj është në një pozitë shumë më të vështirë në negociata”, tha Esteso Perez.
Nga blloku evropian e kanë theksuar vazhdimisht, se pa normalizim të raporteve Kosova dhe Serbia nuk mund të bëhen pjesë e familjes së madhe evropiane.
