Politologu Avdi Smajljaj ka vlerësuar se demonizimi I partive ish-opozitare nuk do t’i kthejë Lëvizjes Vetëvendosje fuqinë që pati në vitin 2021.
Ai ka thënë se kalkulimet politike të asaj kohe e ngritën VV-në mbi 50 për qind, por sipas tij, kjo mbështetje nuk është shndërruar në qeverisjen që qytetarët prisnin.
“Meritokracia ka qenë një nga premtimet kyçe të vitit 2021 që e ka çuar VV-në mbi 50%. Kalkulimet në opozitë e kanë sjellë VV-në në atë rezultat dhe e kanë mbajtur një kohë në pushtet. Nuk besoj se demonizimi i opozitës do ta rikthejë sërish në pushtet, sepse ajo mbështetje nuk është materializuar në qeverisjen që e kanë pritur qytetarët”, ka deklaruar ai në emisionin “Këndi i Debatit” në Tëvë1.
Smajljaj ka theksuar se partitë politike duhet ta kuptojnë domosdoshmërinë e koalicioneve nëse synojnë të qeverisin vendin.
“Nëse këto parti synojnë të qeverisin dhe kërkojnë votën, duhet ta dinë se pa koalicion nuk qeveriset ky vend. Nëse nuk janë të gatshme për koalicione, duhet t’ua bëjnë të ditur qytetarëve, që pastaj ata të vendosin vetë nëse duan ta rrezikojnë votën”, ka shtuar ai.
Ai ka theksuar se formimi i institucioneve do të jetë arritja më e madhe e partive pas zgjedhjeve.
Sipas tij, ngërçi institucional ka prodhuar një degradim të madh politik e administrativ, për të cilin qytetarët po paguajnë çmimin.
“Objektivi kryesor dhe arritja më e madhe e partive do të jetë nëse i bëjnë institucionet. Është degradim i madh dhe përgjegjësinë e mbajnë të gjitha, megjithatë më e madhja i takon partisë që ka më së shumti vota. Qasjet se kush hyn ose s’hyn në qeveri mund t’i dëmtojnë si LDK-në, ashtu edhe VV-në. Qytetarët mund të vendosin t’ia japin votën një partie që garanton koalicion, për të shmangur rrezikun që vendi të mbetet sërish pa qeveri e pa buxhet,” ka përfunduar Smajljaj./teve1.info/
