Ndryshimet klimatike, ngjarjet ekstreme të motit dhe sinjalet e forta të fenomenit “El Nino” janë një paralajmërim serioz për të gjithë rajonin, përfshirë Kosovën dhe Maqedoninë e Veriut, u tha të hënën me rastin e prezantimit të konceptit të sistemit të avancuar të parashikimit dhe paralajmërimit të hershëm multi-hazard, në Fakultetin e Inxhinierisë së ndërtimit në UP “Hasan Prishtina”.
Me këtë rast u theksua nevoja për projekte të përbashkëta, në shërbim të qytetarëve dhe shoqërisë, raporton KosovaPress.
Profesori i Meteorologjisë dhe Fizikës Atmosferike në Universitetin ‘Shën Kirili dhe Metodi’ në Shkup, Vlado Spiridonov tha se duhet të gjejnë burime të përbashkëta financiare dhe teknike.
Spiridonov, i cili njëherësh është edhe anëtar i Këshillit të Sigurisë Kombëtare të Maqedonisë së Veriut tha po ashtu se shërbimet hidrometeorologjike dhe agjencitë për menaxhimin e fatkeqësive duhet të jenë më të koordinuara.
“Shërbimet hidrometeorologjike, agjencitë për menaxhimin e fatkeqësive, qeveritë, qendrat e krizave dhe institucionet e sigurisë duhet të jenë më të koordinuara. Ne duhet të monitorojmë vazhdimisht: motin, klimën, ujërat dhe fenomenet ekstreme atmosferike. Njëkohësisht duhet të jemi në gjendje të parashikojmë këto ngjarje dhe të lëshojmë paralajmërime të hershme për qytetarët. Sistemi klimatik është jashtëzakonisht kompleks. Ai përbëhet nga atmosfera, hidrosfera, kriosfera, biosfera dhe gjeosfera. Por sot ky sistem po bëhet gjithnjë e më i paqëndrueshëm për shkak të ngrohjes globale”, tha Spiridonov.
Ai foli edhe për tempëraturën e Tokës.
“Gjatë periudhave të gjata historike temperatura e Tokës ka qenë relativisht e qëndrueshme. Për rreth 20 mijë vjet ndryshimet e temperaturës kanë qenë shumë të vogla, zakonisht vetëm 0.1 deri në 0.2 gradë Celsius. Por gjatë rreth 150 viteve të fundit temperatura është rritur me mbi 1 gradë Celsius dhe në disa rajone edhe më shumë. Kjo paraqet një ndryshim të jashtëzakonshëm në krahasim me ritmin natyror të ndryshimeve klimatike”, shtoi Spiridonov.
Sipas profesori Spiridonov, arsyeja kryesore e këtij ndryshimi është përdorimi i qymyrit, naftës, gazit dhe lëndëve të tjera djegëse fosile, duke potencuar se si rezultat, përqendrimi i dioksidit të karbonit në atmosferë është rreth 50 për qind më i lartë sesa në periudhën para-industriale.
