Nga këto ndërtesa të shkatërruara në Idlib nga tërmeti i së hënës mrekullisht u shpëtuan disa jetë.
Mirëpo, shumica e kërkim-shpëtimeve u realizuan nga vet banorët me disa mjete bazë, pasi që katër ditë në këtë vend nuk ka ardhur asnjë ndihmë ndërkombëtare.
Për këtë arsye dhjetëra sirianë të enjten mbajtën një demonstratë të heshtur në Sirinë veriperëndimore të kontrolluar nga rebelët duke protestuar kundër reagimit të ngadaltë ndërkombëtar ndaj tërmetit shkatërrues që vrau më shumë se 3 mijë 100 njerëz në zonë.
Ata e konsiderojnë këtë mosveprim si diskriminim racor.
“Kanë kaluar më shumë se 90 orë dhe ekipet e shpëtimit janë ende duke u përpjekur për të shpëtuar disa jetë dhe asnjë lloj ndihme nuk ka hyrë në zonë. Nuk na kanë pajisur me urë ajrore, as pajisje të rënda. Kufijtë janë të hapur me Turqinë, por pse ky mosveprim? Është një diskriminim racor”, ka thënë avokat dhe aktivist sirian, Ahmad Mando.
“Një vajzë e vogël u shpëtua disa orë më parë dhe operacioni i kërkimit është ende duke vazhduar, por vetëm me mjetet bazë të disponueshme. Kjo është zona Besenya, fshati Harem, Idlibi. Ne jemi kundër regjimit të Asadit”, tha Muhyiddin Ahmad, pjesëmarrës në protestë.
“Kanë kaluar katër ditë nga tërmeti dhe familjet ende po qëndrojnë në rrugë në këtë të ftohtë. Ata që nuk kanë vdekur nga tërmeti, do të vdesin nga të ftohtit. Ne kemi nevojë për tenda dhe ndihma”, aktivisti nga zona, Abu Shaheed Al Shami.
Ndërkohë, Kombet e Bashkuara njoftuan se të enjten gjashtë kamionë më në fund kaluan nga Turqia në Siri, megjithatë, këta kamionë me tenda dhe pajisje higjienike ishin planifikuar të kalonin përpara tërmetit.
Përpjekjet për të ndihmuar sirianët pas tërmetit vdekjeprurës u penguan nga lufta civile dhe izolimi i rajonit të kontrolluar nga rebelët përgjatë kufirit që është i rrethuar nga forcat qeveritare të mbështetura nga Rusia.
Kronikë nga gazetarja, Jetmira Lushi
