Pas disa muajsh hetimesh intensive me metoda proaktive, Seksioni për Hetimin e Narkotikëve, në bashkëpunim me Prokurorinë e Tiranës në Shqipëri, ka finalizuar operacionin policor të koduar “Night Clubs”, duke goditur një rrjet të dyshuar për shpërndarje të lëndëve narkotike në zonën e Ish-Bllokut.
Sipas njoftimit të Policisë së Shtetit, gjatë hetimeve janë identifikuar 11 shtetas, punonjës dhe administratorë të lokaleve të natës, të cilët dyshohet se shpërndanin doza të drogave të forta brenda ambienteve ku ushtronin aktivitetin.
“Nga masat e sigurisë të caktuara nga Gjykata, janë ekzekutuar 9 masa “arrest në burg”, ndërsa 2 shtetas të tjerë janë shpallur në kërkim dhe vijon puna për kapjen e tyre. Ndërkohë, gjatë periudhës hetimore janë arrestuar edhe 2 persona të tjerë të përfshirë në këtë veprimtari’, thuhet në njoftim.
Në kuadër të operacionit janë sekuestruar rreth 100 gramë kokainë, 2200 tableta ekstazi (MDMA), si dhe 11 aparate celularë.
Sipas Policisë, të arrestuarit shpërndanin lëndë narkotike kryesisht në ambientet e brendshme të klubeve të natës në zonën e Ish-Bllokut, një nga zonat më të frekuentuara të kryeqytetit.
Gjithashtu, është arrestuar në flagrancë një 49-vjeçar, i cili kishte thyer masën e sigurisë “arrest në shtëpi”, të vendosur më parë nga Gjykata.
Materialet procedurale i janë referuar Prokurorisë së Tiranës për veprime të mëtejshme, ndërsa hetimet vijojnë për dokumentimin e plotë të kësaj veprimtarie kriminale.
